კვირა დღეა, საშინლად ცხელა,ისევ. ჰაერი არ მყოფნის, მძიმედ ვსუნთქავ, ყოველ ხუთ წუთში აბაზანაში შევდივარ, სახეზე წყალს ვისხამ, ცოტახნით მშველის… მერე ისევ მდივანზე ვწვები, მუცელზე ლეპტოპი მიდევს, მთელი დღეა facebook -ის wall- ს ვათვალიერებ, სიცხისგან არეულ ტვინზე უფრო მეტად მოქმედებს სოციალურ ქსელში არსებული კოშმარი. აღარ ვიცი რით გავიყვანო ეს ბლანტად მდინარე დრო, ვერ ვიტან უქმეებს ქალაქში, მითუმეტეს ასეთ საშინელ სიცხეში. ლეპტოპის სიმხურვალე უარესად მწვავს,გადავდე გვერდით და წიგნის კითხვას შევუდექი, “დეიდა ხულია” -ასე ჰქვია წიგნს, მეორედ ვკითხულობ, პირველად რაღაც გულისყურით ვერ წავიკითხე და ისეთი შეგრძნება დამრჩა თითქოს მთავარი რაღაცები გამომრჩა და მათ საპოვნად მეორედ დავიწყე მისი კითხვა. თუმცა დიდხანს ვერც გავაგრძელე. სიცხე იყო მიზეზი, თუ სხვა რამ არ ვიცი, მაგრამ რაღაც ვერ ვიყავი კარგად, ვიღრინებოდი, ცუდი რაღაცები მივწერე მეგობრებს, უაზროდ, ისინი არ იმსახურებდნენ ამას ჩემგან, ამიტომ მივხვდი, საკუთარი თავის იზოლირება იყო საჭირო, მერე გარკვვევა რა მჭირდა და შემდეგ დავბრუნდებოდი სოციუმში. ამ დროს გამახსენდა, რომ ჩემი ბიძაშვილები ბაბუასთან ადიგენში იყვნენ და მივწერე. დავითმა მითხრა, რომ ჩავსულიყავი, თან მისი სამი მეგობარიც იქ იყო, თავიდან თავის შეკავებას ვფიქრობდი, ამდენ ხალხში ყოფნა არ მინდოდა…ხანდახან უაზროდ ვკარგავ კონტროლს და იმას ვაკეთებ რაც ძალიან არ მინდა, მაგრამ ასე გამოდის ხოლმე, თუმცა გადავწყვიტე დავითისთვის დამეჯერებინა და ბოლო მარშრუტკისთვის, რომელიც ოთხის ნახევარზე დიდუბიდან გადიოდა, მიმესწრო. სამს ოცი წუთი აკლდა მზადება დავიწყე, ჩანთაში ვყრიდი ყველაფერს, რაც ხელში მხვდებოდა, 10 წუთში მზად ვიყავი მეტროთი წავედი დიდუბემდე და წუთიწუთზე მივუსწარი,მძღოლმაა ზურგჩანთით რო დამინახა, მაშინვევ რუსულად დამიწყო საუბარი რა სამწუხაროა, სლავური გარეგნობა გაქვსო, ასე მითხრა მოკლედ როგორც იქნა დაიძრა მარშრუტკა. ძალიან მაგარი ამბები ხდება ხოლმე ასეთ მარშრუტკებში: ორი ქალი დასასვენებლად მიდიოდა ბორჯომში, ეტყობოდათ “შვილები უკვე პატრონს ჩააბარეს” და ახლა შეეძლოთ დასვენების უფლება მიეცათ თავისთვის, გზაში მილიონჯერ დაურეკეს შვილებმა, აბა სადა ხართ, როგორ მგზავრობთო, მე მეკითხებოდნენ “სადა ვართ შვილი ახლა?” “ეს რა მდინარეა?” “ბორჯომში რო შევალთ ხო გვეტყვი?” ერთი კაცი იყო კიდე, სავარაუდოდ თურქი, პუტკუნა იყო ვერსად ეტეოდა და საშინლად მძიმე ჩანთა ჰქონდა, ყველა სკამი მოიარა, ვერ მოკალათდა ვერსად. წინ დედა და პატარა ბავშვი ისხდნენ, უკან კი ამ ბავშვის პაპა, ამ კაცს ჩაეძინა და თავს აქეთ -იქით აკანტურებდა, შვილიშვილი კი ამაზე გუულიანად იცინოდა. ჩემი ჩანთა სულ უკან სკამზე იდო, ახალციხეში ამოსული კაცი მიუჯდა და ხელით სინჯავდა,მაგარი “იმპორტული” ჩანთაა ეტყობაო, იძახდა :))(ქეჩუას 65 ლიტრიანი სალაშქრო ჩანთაა), ახალციხეს რომ გავცდით მალევე დაიწყო უასფალტო და მოხრეშილი გზა, გოდერძის უღელტეხილისკენ მიმავალი გზის რეაბილიტაცია დაუწყიათ და პარალელურად, ზეკარის უღელტეხილის გზასაც აპირებენ თურმე, კარგია…. გამიხარდა, იქნებ ეშველოს ამ მხარეს რამე.
დავითს დავურეკე მალე ვიქნები ადიგენში-თქო, კაი დაგხვდბითო. ჩანთის აღება მინდოდა წინასწარ, გავემზადე ჩასასვლელად, ჩემს ჩანთას რომ აკვირდებოდა ის კაცი ჩანთას მაწვდის და ერთ-ორ სიტყვას დამტვრეული ინგლისურით მეუბნება, გამეცინა, ვუთხარი “ინგლისურად კი კარგად საუბრობთ, მაგრამ მე ქართულად მირჩევნია-თქო” შემოირტყა კაცმა ხელი,”უი ბოდიში შვილი, ამერიკელი მეგონეო, really?! მძღოლმა სლავური გარეგნობაო, ამან ამერიკელიო :)))
ბავშვები სიხარულით შემეგებენ და მათ იგივე “კომპლიმენტი” მითხრეს, რომ უცხოელს ვგავარ და ვერ წარმოიდგენდნენ დავითის ბიძაშვილი თუ ვიქნებოდი 🙂 ასე ბარგ აკიდებული წავედით უზღვავი ლუდი და სასუნავები ვიყიდეთ, მივედით კაკლის ხეზე გაკეთებულ ძალიან მაგარ კოტეჯში და ჩემი დახვედრის ცერემონია ლუდში ჩახრჩობით ავღნიშნეთ ^_^ მეორე დღის გეგმა იყო შოშხოთში ასვლა, კაი ღვინის და მწვადების დაგემოვნება.
ჩასვლის დღეს იაშა ბაბუ ვერ ვნახე, გვიან მივედი სახლში, ეძინა, მეორე დღეს დილით ჩვეული ხალისით მითხრა ” ოჰჰ თამარ თმები გაგზრდია, ეტყობა მაგიტო ვერ გიცანი რომ მოხვედიო.”
რაღაცნაირად თბილი ხალხია ეს ადიგენელები. პატარა, ყველასგან მივიწყებული რაიონია, ტურისტული პოტენციალით, მაგრამ როგორც უმეტესი რრაიონი, ესეც ასამუშავებელია. არაფერი ავიწყდებათ, გულით მოგიკითხავენ, უგემრიელეს ხააჭაპურებს დაგიცხობენ. ცოტა აქვთ, მაგრამ რაც აქვთ არაფერს დაიშურებენ, თავს შეგაყვარებენ, გულში ჩაგიხუტებენ, არაფერი აქვთ დასამალი, გულწრფელები არიან. ჰოდა ასეთი ხალხის შემხედვარე, გუნებაც პოზიტიურობისკენ გეხრება, მხიარულდები და ნელ-ნელა გრძნობ უკეთესობას. სახლში სრული დემოკრატია დავამყარე როგორც კი ჩავედი. ყველა ზრუნავს თავისი კომფორტისთვის, არავინაა ვალდებული სხვის მაგივრად დარეცხოს, აალაგოს საწოლები,გააკეთოს საჭმელი. ვიყავით ასე სიამტკბილობაში, მთელი დღე ხან ჰამაკში ვნებივრობდი, ხან ჩემს ოთახში წიგნს ვკითხულობდი, ხან ქართველი ოლიმპიელების ჭიდაობებს ვადევნებდი თვალს, მათთან ერთად ვხარობდი, ვტიროდი. ხან უშბაზე მიმავალი, ძალიან მაგარი ბიჭების ამბებს ვკითხულობდი. მერე ჩვენს ულამაზეს ეზოში ვსეირნობდი და კიდევ ერთხელ ვგრძნობდი აღფრთოვანებას იაშა ბაბუს მიმართ, ეს ადამიანი ჩემს თვალში არის გმირი, არც კი ვიცი, შევძლებდი თუ არა მასავეთ ძლიერი ვყოფილიყავი და ამდენი პოზიტივი შემენარჩუნებია. მას ისეთივე არაჩვეულებრივი მეუღლე ჰყავდა, როგორც თვითონაა, მისი თმასავით ქათქათა სულით, ძალიან თბილი,მზრუნველი, ყველაზე თანგადაყოლილი, მაგარი ქალი, ოჯახის დედაბოძი და დარწმუნებული ვარ იაშა ბაბუს სული და გული, ეს ორი ადამიანი ისეთ მთლიანობას ქმნიდნენ, თითქოს ერთმანეთისთვის იყვნენ გაჩენილი. ბავშვობაში, მახსოვს ახალი წლისთვის ჩამოდიოდნენ კახეთში, იაშა ბაბუ მაღალი, მხრებგანიერი, ერთიშეხედვით მკაცრი იერსახისაა, თამრიკო ბებო მომცრო ტანის, ტკბილი ხმით მოსაუბრე, ძალიან მზრუნველი თვალებით მომზირალი ქალი იყო. ყოველთვის პოზიტიურად განგაწყობდათ ეს წყვილი, მე ძალიან მიყვარდა მათი ტანდემი, ყოველტვის კარგად მახსენდება და ვერასდროს წარმოვიდგენდი მათ ცალ-ცალკე, ისინი ერთი მთლიანობა იყვნენ. თუმცა როდისაა, ისე იყოს ყველაფერი როგორც გვინდა, ასე მოხდა ამ შემთხვევაშიც და დარჩა იაშა ბაბუ მარტო, თავისი მეორე ნაწილის გარეშე, დედაბოძის გარეშე, ახლა მას უწევს იყოს, დედაბოძიცა და იმედიც, რომ არ ჩამოიქცეს ეს სახლ-კარი,მას ხომ შვილიშვილები ჰყავს და მათთვის აკეთებს ყველაფერს. ამ სახლში რომ შედიხარ თითქოს არაფერი შეცვლილა, იაშა ბაბუ შეძლებისდაგვარად უვლის სახლს ჰყავს შინაური ცხოველები, ეზო სავსე აქვს კარტოფილით,ბოსტნეულით, ჟოლოთი, მაყვლით,მოცვით,უამრავი ხილით, გული კი სავსე აქვს დარდით, მაგრამ ერთს არ გაგრძნობინებს, სულ გამხიარულებას ცდილობს. ხანდახან ისე საყვარლად ბუზღუნებს, უნდა მიხვიდე და ჩაეხუტო, “ეს თეფშები აქ რატომ დევს, ასე დაგახვედრეთ მე სახლი? აბა მალე წამოხტით ფეხზე და გააკეთეთ საჭმელი, მომიდუღეთ ყავა, ერთი კოვზი ყავა და შვიდი კოვზი შაქარი:) არ დაგავიწყეთ”. ჩვენ გვეცინება და ვიწყებთ ასე სიცილით მისი ბრძანებების შესრულებას, ის კი აგრძელებს ვითომ სერიოზული სახით “რა გაცინებთ, რა ვთქვი ვითომ ახლა სასაცილო?”
მოსაღამოვდა და გარეთ გასვლას ვაპირებთ, მოკლე შორტი მაცვია და მაისური, იაშა ბაბუ მეუუბნება:”ჩეიცვი ბაბუა და ისე გადი, შეგცივდება, აგრილდა რაღაცნაირად”. მე ვიღიმი და ვეუბნები:”ნუ გეშინიათ, იაშა ბაბუ, ახლავე გამოვიცლი და ისე გავალ”.
მე და ეთო მთელი დღე იმას ვფიქრობდით, რა გაგვეკეთებინა საჭმელი, მერე რო დავიღლებოდით ფიქრით კარტოფილს ვწვავდით: იქვე ბოსტანში გადახვალ, ამოიღებ ხასხასა წითელ კარტოფილს, უცბად გაფრცქვნი , შეწვავ და ვუალაა, საჭმელი მზადაა.
შოშხოთი იქვეა სახლთან, ტყეში. პატარა ბაზილიკის ტიპის ეკლესიაა, მგონი ღვთისმშობლის სახელობის, რესტავრირებულია, გარშემო ძალიან ლამაზი ტყე აქვს. შოშხოთთან ახლოს მწვადი შევწვით,ლელუკას ხაჭაპურებიც გვქონდა, ეს გოგონა საოცარ ხაჭაპურებს და სხვა გემრიელობებს აკეთებს, პირადად ვერ შევძელი მადლობის თქმა და აქედან ვეუბნები, კიტრი დავჭერით, უგემრიელესი სულგუნიც გვქონდა, მწვადი და იაშა ბაბუს ღვინო ❤ მეტი რა გინდა ადამიანს, არც არაფერი;) მალე წვიმა დაიწყო, ფარდულს შევეფარეთ მაგრამ ერთ მხარეს ასხამდა მაინც, შევთანხმდით როგორც კი იკარებდა ცოტას, სახლისკენ დავეშვებოდით, ასეც მოვიქეცით, მოვდიოდით ტალახში ყელამდე ამოზელილები, გაცხარებული ვკამათობდით, ქალისა და მამაკაცის თანასწორობაზე, ვერ ვთანხმდებოდით ვინ იყო დომინანტი, მალე ისე გაცხარდა კამათი, ერთმანეთს არავინ უსმენდა და ამ თემის “შემომგდებს”ვაგინებდი(გულში რა თქმა უნდა), რომელიც სულ წინ მიდიოდა გასუსული და კმაყოფილი ღიმილით :)))) ქალებმა მაგრად დაიცვეს თავისი პოზიცია, მათ ბევრი არგუმენტი აღმოაჩნდათ, აი კაცები კი იმეორებდნენ “ქალს ზოგი რამის გაკეთება არშეუძლიათ, რაც მამაკაცებს ძალგვიძსო”, თუმცა როცა ვეკითხებოდი კონკრეტული მაგალითი მითხარი-თქო, ჩუმდებოდნენ, აი ასეა ეს ამბავი 😉
მეორე დღეს წავიდნენ დავითის მეგობრები, ნახეს ზარზმა, ჭულე და რაბათი და იქიდანვე გაეშურენ თბილისისკენ. დავითი გვიან დაბრუნდა სახლში, დაღლილი. მე და ეთომ კი მთელი დღე სრულ სიმშვიდესა და ნეტარებაში გავატარეთ, საჭმელი გავაკეთეთ, სახლი მივალაგეთ.საღამოს მეზობელს ტყემალი ავუბოჭეთ და იქვე კაკლის ძირში ჩამომჯდარ იაშა ბაბუს შევუერთდით, არაჩვეულებრივი ხედი იშლებოდა ამ ადგილიდან, იქვე ახლოს, სიმწვანეში შეფენილი სოფელი გორგულის სახლები მოსჩანდა მათ უკან ადიგენის რაიონული ცენტრი, ზემოთ კი, შორს ოქროს ციხე გადმოჰყურებდა ამ დალოცვილ მხარეს, ერთ დროს ჯაყელების ერთ-ერთი სტრატეგიული ციხესიმაგრე იყო და ძალიან მნიშვნელოვან როლს თამაშობდა სამცხესათვის. ცოტა დაბლა სმადას ეკლესიაც მოსჩანდა, გადაშლილ ისტორიის წიგნს ჰგავდა აქაურობა, რომლის კომენტარებსაც იაშა ბაბუა გვიყვებოდა. ვისხედით ასე სიმწვანეში ქლიავის ხის ქვეშ, მე იაშა ბაბუ და ეთო, იაშა ბაბუ თავის ამბებს გვიყვებოდა, როგორი ზამთარი ჰქონდა, როგორ დარგო ხილის ხეები და როგორ გააკეთა ახალი ღობე, თან თავის კოხტა ძროხას გაჰყურებდა, არსად გამეპაროსო, “ეს დღეები ნახირში არ გავუშვიო, მალე უნდა გააჩინოს ხბო, უკვე კი უნდა გაეჩინა,მარა არაფერი ეტყობა ჯერო”, მერე ჩაიცინა, შემოგვხედა და გვითხრა “გააჩენს, აბა სა წეიყვანს ბოვშებო ჰა” . გულიანად გაგვეცინა. ახლა სახლში წადით ცივი ნიავია არ გამიცივდეთ “აქანაო”. რა იცოდა იაშა ბაბუმ, ამ ყველაფერს საქვეყნოდ რო გამოვაჭენებდი 😉
ბოლოს წინა დღეც გათენდა ადიგენის რ-ნის სოფელ გორგულში. დილის 10 საათი იქნებოდა მორიდებით შემოიხედა დავითმა ჩემს ოთახში, წამო ყავა დავლიოთო. ავდექი, ავდექი რა ავლაგდი, ჯერ ფეხები გადმოვყავი, მერე წამოვჯექი, მერე წელში გავიმართე და ჯერ ისევ ძილბურანში მყოფი, ბარბაცით დაბლა,კიბეებს ჩავუყევი,დავითი ჰამაკში იწვა ტელეფონის მანათობელ ეკრანს მიშტერებოდა, ეთო როგორც ყოველთვის დაფუსფუსებდა, იაშა ბაბუ არსად ჩანდა. ეთომ მალე ყავა მოადუღა, მე ფოტოების გადაღება დავუწყე ყავას, ეთო ამბობს “მომკლა ამ გოგოს ფოტოებმა,ყველაფერს ფოტოს უღებს”, “გოგო, თბილისში რო ჩავალ ადიგენის ქრონიკები უნდა დავწერო და მაგისთვის მჭირდება”. მართლა ყველაფერს ფოტოს ვუღებდი,ყავის ფინჯნებით დაწყებული ყვავილებით დამთავრებული. ჩემი ბიძაშვილები მსოფლიოში ყველაზე საყვარელი და გამძლეები არიან, საოცარი მოთმინების უნარი გამოიჩინეს, ჩემი საშინელი ხასიათის მიმართ. საერთოდაც ძალიან მხიარული და საყვარელი ბავშვები არიან. ბავშვობაში ბევრ დროს კი ვატარებდით ერთად, მაგრამ რაც სტუდენტაბი გახდნენ უფრო მეტად დავუახლოვდი. დავითი ძალიან მგრძნობიარე, თვალებციმციმა ბიჭია, ძალიან საყვარელი ღიმილით, ის ჩემზე პატარაა, მაგრამ ძალიან კარგად ვუგებთ ერთმანეთს, ის ჩემგან ძალიან განსხვავდება, მაგრამ უსიტყვოდ ესმის ჩემი, ყოველთვის მხარს მიჭერრს და პირიქით. ეთო კიდევ უფრო პატარაა, ძალიან პატარაც მახსოვს, ბევრი დრო არ გვაქვს ერთად გატარებული, თუმცა ძალიან საყვარელი და მომთმენია ისიც, ადვილია მასთან ურთიერთობა, მასთან ერთად კაარგად დაისვენებ, არასდროს გიჭამს უაზრობებით ტვინს, არაფერს გაძალებს და ძალიან მოზომილია, ყოველთვის იცავს საკუთარ კომფორტს და არც შენსას უშლის ხელს. ასეთი ოქროები მყავს. სწორედ მათი დამსახურებაა ის, რომ ამდენი ხნის მანძილე ნამდვილი დასვენება მქონდა,ზედმეტი სიარულებისა და სისულელეების კეთების გარეშე…. დილის ნიავი ქროდა, მზის სხივებიც ნელ-ნელა უფრო ძლიერდებოდა, ჩვენ სამნი ეზოში მაგიდასთან ვისხედით და ეთოს მომზადებულ უგემრიელეს ყავას მივირთმევდით, (მიუხედავად იმისა რომ ყავის მოდუღება, რიგის მიხედვით დავითს ეკუთვნოდა, მაინც ეთოს მოუწია, აღარაფერი გვითქვამს, სიტუაციას არ ვამწვავებდით და სიმშვიდით ვტკბებოდით) ყველა თავის სტიქიაში იყო, მე ვცდილობდი ყავის ფინჯანისთვის ფოტო გადამეღო, ეთო დედას ელაპარაკებოდა მობილურით, დავითი კი მესენჯერს მიშტერებოდა და პატარ-პატარა ყლუპებით ყავას სვამდა, ისე რომ ტელეფონს თვალს არ აშორებდა. ამასობაში იაშა ბაბუც გამოჩნდა ერთი შემოგვძახა “ოჰჰ, თქვე ყალთაბანდებო,ყავას სვამთ და მე არც კი გახსოვართო”, მაშინვე მოვართვით ყავა ბაბუსაც, ერთი მოსვა, გაიღიმა, საყვარლად და გვითხრა “ნიკორა გვყავს ბოვშებოო”. გავმხიარულდით ყველა, ძალიან გაგვახარა ახალი სიცოცხლის დაბადებამ. ჩვენმა ტურფა ძროხუკამ, ვაჟკაცი ნიკორა გააჩინა და ოჯახიც გაგვაბედნიერა. ნიკორა პირველი შვილია. სულ სხვანაირად ქროდა ნიავი იმ წუთიდან, სხვანაირი მხიარული ჩანდა ეზო….
ყოველთვის მიჭირს იქიდან წამოსვლა, სადაც თავს, როგორც სახლში ისე ვგრძნობ, სადაც შენ შენ ხარ, სადაც დილით შეგიძლია ადგე, პირზე ცივი წყალი შეისხა, მთელი დღე პიჟამებით იარო, უგემრიელესი ყავა დალიო ძალიან მაგარ ხალხთან ერთად, იწვეე გამუდმებით ჰამაკში, გაჰყურებდე ჰორიზონტზე ჩამავალ მზეს, რომლის სხივებიც ძალლუმად ცდილობენ სისხლისფრად შეღებონ ცა, უყურო არანორმალურად ლურჯ ცას, დატკბე ხასხასა მწვანით შემოსილი ბაღების ცქერით, სალამი უთხრა ლაღ, გულწრფელ და ლამაზ ხალხს, დაივიწყო ის, რაც ამ დაწყევლილ ქალაქშია, უმოძრაობა, უჰაერობა, სიძულვილი, სიმყრალე……
დილით ადრე ავდექი, ყველაფერი ისევე სწრაფადვე ჩავყაარე ჩანთაში, როგორც აქ წამოსვლისას, 9 საათზე ჩავჯექი მანქანაში და წამოვედი…. სწრაფად და უკან მოუხედავად, რაც უფრო სწრაფად წამოვალ მითუფრი ნაკლებად მეტკინება გული, ვერ ვიტან სახლიდან წასვლებს…თუმცა კარგია, რომ გაქვს შანსი, ნებისმიერ დროს, შეგგიძლია დაბრუნდე…..
თამარა
პ.ს. ადიგენის ქრონიკების ჰიმნი: https://www.youtube.com/watch?v=2vlqC9hQGvs